రూ. 13 కోట్లతో బీటీ రోడ్డు నిర్మాణానికి శంకుస్థాపన చేసిన మంత్రి పొన్నం ప్రభాకర్
ఎల్కతుర్తి, జూలై 6: హనుమకొండ జిల్లా ఎల్కతుర్తి మండలం భవిష్యత్తులో మరింత అభివృద్ధిలో ముందంజలో నిలుస్తుందని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ పేర్కొన్నారు. సోమవారం ఎల్కతుర్తి జంక్షన్ వద్ద మడిపల్లి నుండి ఎల్కతుర్తి జంక్షన్ వరకు కాకతీయ పట్టణాభివృద్ధి సంస్థ (KUDA) ఆధ్వర్యంలో రూ. 13 కోట్లతో చేపట్టనున్న బీటీ రోడ్డు నిర్మాణ పనులకు ఆయన శంకుస్థాపన చేశారు.
రహదారి అనుసంధానంతో గ్రామాలకు మేలు ఈ సందర్భంగా మంత్రి మాట్లాడుతూ, ఈ రహదారి నిర్మాణం పూర్తయితే మండల కేంద్రానికి గ్రామాల మధ్య అనుసంధానం (కనెక్టివిటీ) మెరుగుపడుతుందని, తద్వారా రవాణా సౌకర్యాలు మెరుగుపడతాయని తెలిపారు. ఎల్కతుర్తి మండల కేంద్రానికి కోర్టు, విద్యుత్ ఉపకేంద్రం, తహసీల్దార్ కార్యాలయాలు వస్తున్నాయని, ఇది ప్రాంతీయ అభివృద్ధికి దోహదపడుతుందని వివరించారు. స్థానిక ప్రజాప్రతినిధులు, ప్రజల కోరిక మేరకు ఈ రోడ్డు నిర్మాణాన్ని చేపట్టినట్లు తెలిపారు. నాణ్యతతో పనులను వేగంగా పూర్తి చేయాలని ఆయన అధికారులను ఆదేశించారు.
ఈ కార్యక్రమంలో కుడా చైర్మన్ ఇనగాల వెంకట్రామిరెడ్డి, హనుమకొండ జిల్లా కలెక్టర్ చాహత్ బాజ్పాయ్, మార్కెట్ కమిటీ చైర్మన్ సంతాజీ తదితరులు పాల్గొన్నారు. అనంతరం, ఎల్కతుర్తి నుండి దామెర వెళ్లే ప్రధాన రహదారిని మంత్రి అధికారులతో కలిసి పరిశీలించి, ప్రజలకు రాకపోకల్లో ఇబ్బందులు లేకుండా చర్యలు చేపట్టాలని ఆదేశించారు.
బాబూ జగ్జీవన్ రామ్ వర్ధంతి ఇదే సందర్భంగా భారత మాజీ ఉప ప్రధాని స్వర్గీయ బాబూ జగ్జీవన్ రామ్ వర్ధంతిని పురస్కరించుకుని, ఆయన చిత్రపటానికి మంత్రి పొన్నం ప్రభాకర్ పూలమాల వేసి ఘన నివాళులు అర్పించారు.
About the Author
