వికారాబాద్, దుర్గం చెరువు అభివృద్ధిపై సీఎం రేవంత్ రెడ్డి కీలక నిర్ణయాలు
హైదరాబాద్: ఎంసీఆర్ హెచ్ఆర్డీ (MCRHRD) బోధి పెవిలియన్లో ముఖ్యమంత్రి రేవంత్ రెడ్డి పర్యాటక శాఖపై ఉన్నతస్థాయి సమీక్షా సమావేశాన్ని నిర్వహించారు. రాష్ట్రంలో పర్యాటక రంగాన్ని అంతర్జాతీయ ప్రమాణాలతో అభివృద్ధి చేయాలని, ప్రధాన పర్యాటక ప్రాంతాలను ఆధునీకరించాలని సీఎం అధికారులకు దిశానిర్దేశం చేశారు.
సమావేశంలో తీసుకున్న కీలక నిర్ణయాలు:
- ప్రధాన ప్రాంతాల ఆధునీకరణ: తారామతి బారామతిని పర్యాటక కేంద్రంగా మరింతగా అభివృద్ధి చేయాలని, దుర్గం చెరువును పూర్తి స్థాయి పర్యాటక ప్రాంతంగా తీర్చిదిద్దాలని సీఎం ఆదేశించారు. అలాగే మంజీరా, దిల్ కుషా గెస్ట్ హౌస్లను ఆధునీకరించాలని సూచించారు.
- వికారాబాద్ అభివృద్ధి: టూరిజం హబ్ డెవలప్మెంట్ పథకం కింద వికారాబాద్ను అభివృద్ధి చేయాలని నిర్ణయించారు. ముఖ్యంగా వికారాబాద్లోని వీరభద్రస్వామి దేవాలయాన్ని యాదాద్రి తరహాలో అభివృద్ధి చేసేందుకు ప్రత్యేక కమిటీని ఏర్పాటు చేయాలని ఆదేశించారు.
- ఎకో-టూరిజం: క్యూర్ (QURE) పరిధిలోని అటవీ భూములను పర్యాటక శాఖతో కలిసి ఎకో-టూరిజంగా అభివృద్ధి చేయాలని, గుర్రంగూడ ఎకో పార్క్ తరహాలో నగరంలో మరిన్ని పార్కులను ఏర్పాటు చేయాలని సూచించారు. ఫ్యూచర్ సిటీలోని అటవీ భూములను అంతర్జాతీయ స్థాయిలో అర్బన్ ఫారెస్ట్ తరహాలో తీర్చిదిద్దాలని, ఇందుకోసం ప్రత్యేక అధికారిని నియమించి పనులను ముమ్మరం చేయాలని కోరారు.
- హెరిటేజ్ ప్రాజెక్టులు: పురానాపూల్ హెరిటేజ్ బ్రిడ్జిలను అభివృద్ధి చేసి పర్యాటక ప్రాంతాలుగా మార్చాలని, అక్కడ పర్యాటకుల కోసం ప్రత్యేక ఏర్పాట్లు చేయాలని సీఎం సూచించారు. ట్రాఫిక్ మళ్లించే అవకాశం ఉంటే, బ్రిడ్జిలపై పర్యాటకులకు పూర్తిస్థాయి అవకాశం కల్పించాలని పేర్కొన్నారు.
- గ్లోబల్ ఇన్వెస్ట్మెంట్ సమ్మిట్: డిసెంబరులో నిర్వహించనున్న గ్లోబల్ ఇన్వెస్ట్మెంట్ సమ్మిట్ కోసం ఇప్పటి నుంచే కసరత్తు ప్రారంభించాలని, అన్ని శాఖల మధ్య సమన్వయం కోసం ప్రత్యేక కమిటీలను ఏర్పాటు చేయాలని ఆదేశించారు.
ఈ సమావేశంలో సీఎం సలహాదారు రామకృష్ణా రావు, ప్రభుత్వ ప్రత్యేక ప్రధాన కార్యదర్శి జయేష్ రంజన్, సీఎంఓ ముఖ్య కార్యదర్శి శేషాద్రి, సీఎం ప్రిన్సిపల్ సెక్రటరీ శ్రీధర్, టూరిజం సెక్రటరీ వాణి ప్రసాద్, టూరిజం కార్పొరేషన్ ఎండీ గౌతమి తదితరులు పాల్గొన్నారు.
About the Author
